ماتلاحظون ان الزمن يجري بساع
وان الشهر يمضي كأنه دقيقة

وماتلاحظون ان اغلب الناس ملتاع
وكلٍ يحس بداخل الصدر ضيقة

وماتلاحظون ان البشر صاروا سباع
حتى الشقيق ان جاع ياكل شقيقه

وماتلاحظون ان الغدر بالبشر شاع
ومابه رفيقٍ مانطعن من رفيقه

وماتلاحظون ان الحيا للأسف ماع
واصبح مثقف من لديهِ صديقه

وماتلاحظون ان القيم وصْلت القاع
من بعد ماهي نجم يجذب بريقه

سبحان منهو بدّل اوضاع باوضاع
حتى الخيال اصبح نشوفه حقيقة

فتن فتن مختلطة اشكال وانواع
فتن بعضها من بعضها رقيقة

يارب ياستّير يااللي بالاصباع
-سبحانك- تْقلّب قلوب الخليقة

ثبّت خفوق اللي لاوامرك منصاع
واغفر ذنوب اللي ذنوبه عريقة

واصلح بفضلك ياالولي كل الاوضاع
وانقذ نفوسٍ في هواها غريقة



حسين البليهي