أولا حياك الله أخي . . .

النظرة لها أسباب من كل جهة
1- تخلفنا العمراني والاقتصادي على أهمية موقع منطقتنا ( يمكن سببت جزء من النظرة
2- لاحظت لما يأتي طاري الشمال على طول اسمع ( أهل كرم ونخوة وطيبه وووو يذكرون أشياء محد يختلف عليها لكن ما اسمع اى مدح للناحية العلمية والثقافية
( تدرى احدهم وش قال : أنا عشت مع أهل الشمال أكرم وأطيب ناس لكن الشمال إفريقيا السعودية .. حز في نفسي الوصف .. حنا بخير ولا منين نكرم لكن لاحظت ان بعض الناس يقيمون ثقافة البلد ( من شوارعها وبيوتها ومولاتها وحدائقها ) للأسف

3- بعضنا ولا اعمم يا أهلها يمكن سبب النظرة .. مثل ما قال أخي همام بالموقف اللي صار عند الصرافة
أنا عايشه في مجتمع معلمات جامعيات سواء بالمدارس او في بيتنا
اقسم لك أخي ولا أعمم على الكل أقصى حدهن الماركة الفلانية والعلانية .. يتسابقن على أن يلبسن أبنائهن وبناتهن ارقى الماركات .. يتسابقن إن عيالي يشرون أيباد ولا بلاك بيري قبل عيال فلانة وهذي الاشياء مافيها شي بل شي جميل لكن .. ان يغلب الموهم على الاهم هنا الموشكل .

( أما التربية والاحترام تثقيف أبنائهن الحرص على جوانب أخرى مثل السلوك وتعلم لغات تنمية مواهبهم ) أخر شي يفكرن فيه ... أقولك ليه يشترن لهم الايباد والبلاك بيرى وبعضهم والله ما تعدى الابتدائي ... مو عشان الطفل يتثقف وينمى مواهبه لا ... عشان تسكته .. حتى والله إن مافيه أي متابعه لهم . . . هذا نموذج من وسط المثقفين والجامعيين

لا يقول احد الكل كذا .... حنا ما علينا من الكل حنا علينا من مجتمعنا الصغير اللي يغلب اى تصرف لو من قلة عليه كله . . .
وأقسم لك .. إن بعضهن لما اهتمن بالناحية الثقافية واشتغل على أنفسهن .. قمة الإبداع ومن المتميزات الآن برفحاء . .

4- العصبية ( وجدت ناس يسبون المنطقة فقط لمجرد السب .. ولا اعلم مافي نفسه .. بل يبحث عن اى شي يسئ للمنطقة .. هل هو حقد قبلي حقد منطقي .. موقف حصل له سابق .. لكن النظرة تكون سوداويه وظالمه

5- إهمال حكومي للمثقفين بمنطقتنا وتهميشنا ... حتى للتعليم بمنطقتنا .. اسواء المدارس والإمكانيات والأساليب .. اجل المدارس بالمناطق الأخرى لها سنوات تتعامل بالكمبيوتر والوسائل التعليمية الذكية .. وحنا قبل فترة بسيطة غيروا سبوراتنا من طباشير لخطاط ... هالتهميش اخرج لنا طلاب طموحهم معسل في استراحة وبنت همها وش أخر تسريحات شوجي .. وما ألومهم .. تحطيم نفسي ومعنوي من كل الجهات ..حتى مراكز للموهوبين ولا مراكز صيفيه مثل الناس لا نملك

النظرة هذي لها أسباب من كل جهة . . .

لحد يزعل من كلامي ... لان كلام المحب غير كلام المبغض
اكثر إنسانه تتمنى تشوف بلدتي الصغيره وأهلها احسن ناس هي عروووبة